2026 оны 6 дугаар сарын 2–5, БНХАУ — Монгол Улсын Озоны Үндэсний Алба, Эрчим Хүчний Зохицуулах Хороо болон Монголын Хөргөлт, Халаалт, Агааржуулалтын Холбооны төлөөлөгчид хөргөлт, агааржуулалтын тоног төхөөрөмжийн эрчим хүчний үр ашгийн хамгийн бага стандарт (MEPS) болон эрчим хүчний үр ашгийн шошгожуулалтын тогтолцоог хөгжүүлэх, хэрэгжүүлэх чиглэлээр БНХАУ-д туршлага судлах сургалт, уулзалтад оролцлоо.
Тус айлчлалыг БНХАУ-ын Экологи, байгаль орчны яамны Гадаад хамтын ажиллагааны төв (FECO/MEE), НҮБ-ын Байгаль орчны хөтөлбөрийн OzonAction хөтөлбөрийн Өмнөд Азийн бүсийн багтай хамтран зохион байгуулсан бөгөөд Монреалийн протоколын хэрэгжилтийг дэмжих Олон талт сангийн (MLF) санхүүжилтээр хэрэгжүүлж байна.
Айлчлалын хүрээнд Монголын төлөөлөгчид Хятадын Стандартчиллын үндэсний хүрээлэн (CNIS), Хятадын Ахуйн цахилгаан хэрэгслийн судалгааны хүрээлэн (CHEARI), Хятадын Чанарын баталгаажуулалтын төв (CQC), Хятадын Хөргөлт, агааржуулалтын салбарын холбоо (CRAA) болон үйлдвэрлэлийн байгууллагуудад зочилж, MEPS боловсруулах арга зүй, бүтээгдэхүүний туршилт, баталгаажуулалт, цахим бүртгэл, зах зээлийн хяналтын тогтолцооны талаар туршлага судлав.
БНХАУ-ын туршлагаас харахад эрчим хүчний үр ашгийн бодлогыг хэрэгжүүлэхэд стандарт боловсруулах, лабораторийн туршилт, бүтээгдэхүүний баталгаажуулалт, зах зээлийн хяналт гэсэн уялдаа холбоотой тогтолцоо чухал болохыг онцлон тэмдэглэв. Мөн үйлдвэрлэгч бүр бүтээгдэхүүний загвар тус бүрийг цахим бүртгэлийн системд бүртгүүлж, эрчим хүчний үзүүлэлтийг хянах тогтолцоотой танилцлаа.
Түүнчлэн дулааны насос болон хөргөлтийн тоног төхөөрөмжийн гүйцэтгэлийн туршилтын аргачлалтай танилцаж, Монгол орны эрс тэс уур амьсгалд тохирсон, -40°C хүртэл ажиллах боломжтой агаар-агаар дулааны насосны технологи-ийн талаар мэдээлэл авлаа.
Энэхүү туршлага судлах айлчлал нь Монгол Улсад хөргөлт, агааржуулалтын тоног төхөөрөмжийн эрчим хүчний үр ашгийн стандарт, шошгожуулалтын тогтолцоог хөгжүүлэх, дэлхийн дулааралд нөлөөлөх чадвар багатай, эрчим хүчний хэмнэлттэй хөргөлтийн технологийг дэмжихэд чухал ач холбогдолтой боллоо.
Монгол Улс БНХАУ-ын туршлагыг үндэсний нөхцөл, тэр дундаа хүйтэн уур амьсгалын онцлогтой уялдуулан ашиглаж, тогтвортой хөргөлтийн салбарын хөгжлийг дэмжих чиглэлээр цаашид ажиллах болно.
